Ils 9 e 10 da settember 2017 dat ei a Mustér ina sentupada culs Ladins dallas Dolomitas. La «Volkstanzgruppe Gröden» ei ina giuvna gruppa che tgira ils usits e la tradiziun che semuossa el cant, musica, sault popular ed entras purtar ils costums. Medemamein tgira era la gruppa che senumna «Frauendreigesang mit Otto Dellago da St. Ulrich» il cant popular. Ellas vegnan accumpignadas dil ghitarist e dirigent Otto Dellago.

La sonda, ils 9 da settember 2017 allas 15.00 – 18.00 han dus luvratoris liug, ils quals la gruppa da sault da St. Ulrich e l’Uniun da costums Mustér emprendan mintgamai dus saults tradiziunals da lur regiun. El luvratori da musica elaboreschan ils scolarAs dalla Scola da musica Surselva e la gruppa da cant da St. Ulrich ils tocs musicals ch’els vegnan a sunar la dumengia, ils 10 da settember 2017 duront il survetsch divin en baselgia S. Gions allas 9.30.

Tut tgi che ha plascher, astga bugen visitar ils luvratoris che han liug en l’aula dalla casa da scola ed en halla Cons.

Dumengia suenter il survetsch divin ei in e scadin envidaus a gentar en halla Cons. Ei vegn surviu spisas dalla regiun dallas Dolomitas. Las gruppas procuran per divertiment cun cant, sault e musica ed era la cultura dalla regiun dallas Dolomitas vegn presentada.

Cordial beinvegni