La fin dall’jamna dils 9 e 10 da settember 2017 ein ils Ladins dallas Dolomitas el Tirol dil sid sentupai a Mustér per in brat cultural. Igl ei vegniu saltau, cantau e fatg musica communablamein. La gruppa da musicants e la gruppa da cant han sunau e cantau la dumengia duront il survetsch divin a S. Gions. Sin moda fetg simpatica ha Sofia prensentau la cultura dalla regiun dallas Dolomitas en halla Cons. Ins ha schau gustar il grondius gentar en buna cumpignia. Autoritads dalla vischnaunca e la menadra digl Uffeci cantunal per cultura e lungatgs han drizzau entgins plaids als vischins Ladins ed a tuts presents.

Enteifer il program da recreaziun ha il moderatur Gion capiu da tschaffar ils participonts da rispunder a sias damondas. La giuvna gruppa da sault Gröden da St.Ulrich ha procurau per divertiment cun lur saults plein slontsch. Buca meins plascher han ils saltunz dall’Uniun da costums Mustér giu cura ch’els han atgau saltar ils quater saults ensemen cun la giuvna gruppa da sault. Il cant dalla gruppa Frauendreigesang han perschuadiu cun sias vuschs sonoros il publicum. Ils dus musicists Otto e Paul han accumpignau las scharmantas cantaduras cun fin sensori alla ghitara ed agl accordeon. Dau en egl ei bein ch’ils Ladins ein loschs da tgirar lur tradiziun polulara. Las duas canzuns popularas, Gherdëina ed En in vitg alpin ein vegnidas cantadadas cun tschaffen ed anim alternont dallas gruppas ed alla fin cun igl entir publicum. Quella sentupada interculturala ei stada per tuts participonts ina grondiusa experientscha.

A scadinas persunas che han sin ina moda u l’autra segidau per il bein reussir da quella sentupada admetta la suprastonza dil forum in resentiu engraziament.

Artechel ella gasetta La usc di Ladins dils 22-9-2017

« ‹ von 2 › »